Wauguzi na wakunga 900 wapatiwa mafunzo elekezi

30 October 2026, 17:33

Mafunzo  hayo  yanatarajiwa  kuwaimarisha  wanafunzi  hao  katika  kuunganisha  nadharia  waliyo  jifunza  darasani  na  uhalisia  wa  kazi,  hatua  inayolenga  kuongeza  ubora  wa huduma  za  uuguzi  na  ukunga  pamoja  na  kuimarisha  afya ya  wananchi  nchini.

Na Anwary Shaban.

Takribani  wanafunzi  900  wa  vyuo  vikuu  nchini  Tanzania wanaosomea  shahada  ya  uuguzi  na  ukunga  wamepatiwa mafunzo  elekezi  yatakayo waandaa  kutoa  huduma  za  afya  kwa  vitendo  katika  vituo  mbalimbali  vya  afya  nchini  kwa kipindi  cha  mwaka  mmoja.

Mafunzo  hayo  yameandaliwa  na  TARAJALI (INTERNS)  kwa kushirikiana  na  Baraza  la  Uuguzi  na  Ukunga  Tanzania,  kwa lengo  la  kuwawezesha  wanafunzi  hao  kuzingatia  viwango  vya ubora , maadili  na  weledi  katika  utoaji  wa  huduma   kwa wananchi.

Akizungumza  na  Taswira  ya  Habari  jijini  Dodoma,  Mkurugenzi  Msaidizi  anayesimamia  masuala  ya  ubora  wa huduma  za  uuguzi  na  ukunga  kutoka  Wizara  ya  Afya,  Sir Turini  Manangwa, amesema  mafunzo  hayo  ni  muhimu  katika kuwaandaa  wanafunzi  kutoa  huduma  bora  na  salama  kwa wagonjwa  wanapo kwenda  katika  vituo  vyao  vya  mafunzo  kwa  vitendo.

Kwa  upande  wake,  Msajili  wa  Baraza  la  Uuguzi  na  Ukunga  Tanzania , Agnes  Mtawa,  amesema  baraza  hilo lina wapatia  wanafunzi  hao  usajili  wa  awali  ili  kuwawezesha kuanza  mafunzo  kwa  vitendo,  akibainisha  kuwa  vituo 40 vimeandaliwa  kwa ajili  ya  kupokea  wanafunzi  hao  watarajali.

Amesisitiza  kuwa  wanafunzi  hao  wanapaswa  kuzingatia  maadili ya  taaluma , weledi  na  taratibu  za  utoaji  wa  huduma  za  afya  katika  kipindi  chote  cha  mafunzo  yao.

Nao  baadhi  ya  wanafunzi  hao  kutoka  vyuo  mbalimbali  vya uuguzi  na  ukunga  wamesema  wamejiandaa  kutumia  maarifa  na  ujuzi  walioupata  katika  kuwahudumia  wagonjwa,  huku wakiahidi  kuzingatia  maadili  ya  taaluma  na  kuhakikisha  jamii inapata  huduma  bora  za  afya.