Watumiaji dawa za kulevya wageukia dawa tiba zenye asili ya kulevya

6 November 2026, 17:16

Mapambano dhidi ya dawa za kulevya si jukumu la mamlaka pekee, bali yanahitaji ushirikiano wa familia na jamii kwa ujumla.

Na Anwary Shaban.

Udhibiti  wa  uingizaji  wa  dawa  za  kulevya  nchini, hususan heroin, umeibua changamoto mapya baada  ya  baadhi  ya  watumiaji  kugeukia  matumizi  ya  dawa  tiba zenye  asili  ya  kulevya  zinazopatikana  hospitalini.

Hali  hiyo  imeelezwa  na  Mamlaka  ya  Kudhibiti  na Kupambana  na  Dawa  za  Kulevya  (DCEA)  kuwa watumiaji wapo katika hatari zaidi ya kiafya.

Changamoto  hiyo  imebainishwa  jijini  Dodoma  na  Afisa Mwandamizi  wa  DCEA,  Said  Madadi,  wakati  akitoa  elimu kuhusu  madhara  ya  dawa  za  kulevya  kwa  wafanyabiashara  na  wananchi  katika  eneo  la  Machinga Complex,  akieleza  namna  mabadiliko  ya  upatikanaji  wa dawa  hizo  yanavyoibua  aina  nyingine  za  matumizi hatarishi.

Katika  kuendeleza  mapambano  hayo, Kaimu Kamishna  wa DCEA  Kanda  ya  Kati, Anna Tengie,  amesema  mamlaka  hiyo itaendelea  kuimarisha  operesheni  za  kudhibiti  uzalishaji, biashara, usambazaji na matumizi ya dawa za kulevya, akieleza kuwa tatizo hilo linachangia vitendo vya uhalifu na kuathiri ustawi wa jamii.

Kwa upande wao, Juma Banka na Frank Ndalu, ambao ni miongoni mwa wanufaika wa elimu hiyo, wamesema wameamua kuachana na matumizi ya dawa za kulevya na kutoa wito kwa jamii kushirikiana na DCEA katika mapambano hayo.

Wamesimulia pia madhila waliyopitia wakati wa matumizi ya dawa hizo, ikiwemo kupoteza heshima na kujikuta wakifanya vitendo visivyo vya kawaida mbele ya familia zao, kama kujisaidia haja ndogo mbele ya wazazi wao.

Wito umetolewa kwa wananchi kutambua kuwa mapambano dhidi ya dawa za kulevya si jukumu la mamlaka pekee, bali yanahitaji ushirikiano wa familia na jamii kwa ujumla, huku wanaokumbwa na tatizo hilo wakihimizwa kutafuta msaada wa kitaalamu ili kurejea katika maisha yenye afya na heshima.