Wananchi Bahi Makulu kupelekewa huduma ya maji

29 May 2023, 8:09 pm

Na Bernad Magawa.

Mbunge wa jimbo la Bahi Mheshimiwa Kenneth Nollo ameahidi kupeleka huduma ya maji safi katika kijiji cha Bahi Makulu ili kuwaondolea adha wananchi kutokana na kutokuwepo kwa huduma hiyo kijijini hapo.

Nollo ameyasema hayo Mei 28, 2023 aliposhiriki ibada na kuendesha harambee ya ujenzi wa Kanisa Katoliki kigango cha Bahi Makulu ambapo zaidi ya shilingi milioni 5.4 zilichangwa huku Mheshimiwa Nollo akichangia milioni 1.5 kwa ajili ya kuezeka paa la kanisa hilo ambalo boma limejengwa kwa nguvu za waumini ambapo kanisa hilo linatarajia kugharimu zaidi ya shilingi milioni 75 mpaka kukamilika.

Akizungumza katika harambee hiyo, diwani wa kata ya Mpamantwa ambaye pia ndiye mwenyekiti wa kamati ya elimu, afya na maji wilaya ya Bahi Mheshimiwa Sostenes Mpandu amemshukuru mbunge kwa utayari wake wa kushiriki katika kazi hiyo ya kiimani.

 Katika hatua nyingine, Mwenyekiti wa Dekania ya Mtakatifu Yohane Mbatizaji Bwana Alex Madabasi amempongeza Mheshimiwa Nollo kwa kusimamia vema maendeleo ya jimbo la Bahi.