Joy FM

Je, rushwa ya ngono yapungua mwalo wa Kibirizi Kigoma?

18 November 2026, 11:33

Muonekano wa wanawake wachuuzi wa samaki na dagaa, Picha na Joy Fm

Elimu kwa umma na ushirikiano wa wananchi vinaendelea kuwa sehemu muhimu katika juhudi za kukabiliana na vitendo vya rushwa katika maeneo ya biashara

Na Timotheo Leonard

Wanawake wachuuzi wa samaki katika Mwalo wa Kibirizi, Manispaa ya Kigoma Ujiji, wamesema vitendo vya rushwa ya ngono katika eneo hilo vimepungua, wakihusisha mabadiliko hayo na elimu iliyotolewa na Taasisi ya Kuzuia na Kupambana na Rushwa (TAKUKURU), Mkoa wa Kigoma.

Ni takribani miezi miwili sasa tangu TAKUKURU Mkoa wa Kigoma kutoa elimu kwa wanawake hao kuhusu madhara ya rushwa ya ngono, namna ya kukabiliana na vitendo hivyo pamoja na umuhimu wa kutoa taarifa kwa mamlaka husika.

Elimu hiyo ilitolewa kufuatia taarifa zilizowahi kuripotiwa kuhusu madai ya kuwepo kwa vitendo vya rushwa ya ngono katika Mwalo huo, ikiwemo taarifa zilizorushwa na Radio Joy FM.

Baada ya kupita kwa kipindi hicho, baadhi ya wanawake wachuuzi wa samaki wanasema wameanza kuona mabadiliko katika mazingira yao ya biashara, wakieleza kuwa vitendo hivyo vimepungua ikilinganishwa na hali iliyokuwepo awali.

Sauti ya wanawake wachuuzi wa samaki

Kwa upande wao, baadhi ya wavuvi katika Mwalo wa Kibirizi wamewataka wanawake kutumia mitaji waliyonayo kuendesha biashara zao badala ya kushawishika kuingia katika vitendo vya rushwa ya ngono ili kupata samaki.

Sauti ya Wavuvi

Akizungumzia hali hiyo, Mwenyekiti wa Mtaa wa Kibirizi, Kudra Jafari, amesema kwa mtazamo wa uongozi wa eneo hilo, vitendo vya rushwa ya ngono vimepungua kufuatia wananchi kupatiwa elimu kuhusu madhara ya vitendo hivyo.

Sauti ya Mwenyekiti wa Mtaa wa Kibirizi, Kudra Jafari

Naye Mkuu wa Dawati la Elimu kwa Umma TAKUKURU Mkoa wa Kigoma, Ibrahim Sadick, amesema taarifa wanazozipokea zinaonesha dalili za kupungua kwa vitendo hivyo.

Sadick amesisitiza kuwa TAKUKURU itaendelea kutoa elimu kwa wananchi ili kuongeza uelewa kuhusu rushwa ya ngono na namna ya kupambana nayo.

Sauti ya Mkuu wa Dawati la Elimu kwa Umma TAKUKURU Mkoa wa Kigoma, Ibrahim Sadick

Aidha, amewataka wananchi wote wanaokumbana na vitendo vya rushwa, ikiwemo rushwa ya ngono, kutokubali kushawishiwa na badala yake kutoa taarifa kwa mamlaka husika ili hatua stahiki ziweze kuchukuliwa.