Mazingira FM
  Stream radio
Menu
Mazingira FM
  2. Ulemavu
  3. TLB yaibua changamoto za wasioona, yataka huduma jumuishi

TLB yaibua changamoto za wasioona, yataka huduma jumuishi

15 October 2026, 8:55 pm

Picha za matukio mbalimbali katika kilele cha Maadhimisho ya Fimbo Nyeupe yaliyofanywa na Chama cha Wasioona TLB yaliyofanyika kitaifa eneo la Lamadi wilaya ya Busega mkoani Simiyu

Bado kuna changamoto ya unyanyapaa na kuwafungia ndani watu wasioona, hali inayowanyima fursa za elimu na huduma zingine za kijamii.

Na Edward Lucas.

Chama cha Wasioona Tanzania (TLB) kimeitaka jamii kuondoa unyanyapaa na mitazamo hasi dhidi ya watu wasioona, kikisisitiza kuwa kutokuona hakumaanishi kukosa uwezo, vipaji wala mwelekeo wa maisha.

Wito huo umetolewa leo, Oktoba 15, 2026, katika kilele cha Maadhimisho ya Siku ya Fimbo Nyeupe yaliyofanyika katika Ukumbi wa Mlobezi, Lamadi, wilayani Busega, mkoani Simiyu, yenye kaulimbiu isemayo “Kutoona Sio Kupoteza Dira.”

Katika risala ya TLB, Kaimu Katibu Mkuu wa chama hicho, Loata Lomitu Molel, amesema bado kuna changamoto ya unyanyapaa na kuwafungia ndani watu wasioona, hali inayowanyima fursa za elimu na huduma nyingine za kijamii.

Sauti ya Loata Molel
Wanachama Chama cha Wasiiona TLB wakiwa katika ukumbi kushriki kilele cha Maadhimisho ya Kitaifa ya Fimbo Nyeupe yaliyofanyika leo tarehe 15 Oktoba 2026 ukumbi wa Mlobezi uliopo Lamadi wilaya ya Busega mkoani Simiyu

Molel amesema pamoja na juhudi zinazofanywa na Serikali na wadau, bado kuna haja ya kuboresha shule na huduma za kijamii ili ziwe rafiki na fikivu kwa watu wasioona. Ameongeza kuwa TLB ina wajibu wa kuendelea kufanya utetezi na ushawishi, huku akiomba wadau kuunga mkono juhudi za chama hicho katika kuwawezesha wanachama kiuchumi na kuimarisha rasilimali za chama.

Sauti ya Loata Molel

Maadhimisho hayo yametanguliwa na kongamano la siku mbili lililoanza Oktoba 13, likiwakutanisha wanachama takribani 250 kutoka mikoa 22 ya Tanzania Bara, kwa ajili ya kujifunza na kujadili mikakati ya kuwawezesha watu wenye ulemavu wa kuona. Katika kilele hicho, TLB pia imegawa fimbo nyeupe kwa ajili ya watu wasioona kupitia wawakilishi kutoka maeneo mbalimbali.

Kwa upande wake, mgeni rasmi na Mwenyekiti wa TLB Taifa, Habiba Salum Ngulangwa, amewahimiza watu wasioona kutokata tamaa, bali kujituma na kutumia fursa za mafunzo ya ujasiriamali ili kujenga maisha ya kujitegemea.

Sauti ya Habiba Ngulangwa
Mgeni rasmi na Mwenyekiti wa TLB Taifa, Habiba Salum Ngulangwa akikabidhi Fimbo Nyeupe kwa wawakilishi kutoka mikoa mbalimbali kwa ajili ya watu wasiiona katika maeneo yao

Ngulangwa amesema kutokuona hakupaswi kuwa sababu ya mtu kujitenga na jamii, akisisitiza umuhimu wa kuchangamkia fursa zilizopo ili kujitegemea na kushiriki katika shughuli za maendeleo.

Maadhimisho hayo yanaweka msisitizo juu ya wajibu wa jamii kuhakikisha watu wasioona wanapata haki, huduma na fursa sawa, kwa kuzingatia kaulimbiu isemayo: Kutoona Sio Kupoteza Dira.