Storm FM
  Stream radio
Menu
Storm FM
  2. Elimu
  3. GGML, TAKUKURU waikumbusha jamii kupinga rushwa

GGML, TAKUKURU waikumbusha jamii kupinga rushwa

14 May 2025, 8:58 am

Katibu tawala mkoa wa Geita (wa nne kutoka kulia) akiwa na viongozi kutoka GGML na TAKUKURU. Picha na Ester Mabula

Taasisi ya kuzuia na kupambana na Rushwa (TAKUKURU) mkoa wa Geita ikishirikiana na GGML wafungua warsha ya siku 2 kwa lengo la kutoa elimu juu ya kukabiliana na Rushwa.

Na: Ester Mabula:

Warsha hiyo, iliyoanza jana Mei 13, itaendelea leo Mei 14, 2025 katika ukumbi wa St. Aloysious mjini Geita imewakutanisha washiriki kutoka sekta mbalimbali zikiwemo taasisi za serikali, mashirika binafsi pamoja na viongozi wa jamii.

Akizungumza wakati wa ufunguzi wa warsha hiyo Mkurugenzi mtendaji wa kampuni ya uchimbaji Dhahabu ya Geita (GGML) Duran Achery amesema kuwa kampuni hiyo imejikita si tu katika shughuli za uchimbaji wa madini, bali pia katika kujenga jamii inayoheshimu maadili na kupinga vitendo vya rushwa.

Sauti ya mkurugenzi mtendaji GGML Duran Achery
Mkurugenzi mtendaji wa GGML Duran Achery akizungumza na washiriki katika ufunguzi wa warsha

Mkuu wa TAKUKURU mkoa wa Geita James Ruge amesema lengo kuu la TAKUKURU ni kudhibiti Rushwa na kusisitiza kuwa taasisi hiyo itaendelea kushirikiana na wadau mbalimbali kama GGML ili kufanikisha azma hiyo.

Sauti ya mkuu wa TAKUKURU mkoa wa Geita James Ruge
Mkuu wa TAKUKURU mkoa wa Geita James Ruge akizungumza na washiriki katika ufunguzi wa Warsha.

Katibu tawala mkoa wa Geita Mhe. Mohamed Gombati aliyekuwa mgeni rasmi katika warsha hiyo amesema jukumu la kupambana na Rushwa ni la wote na si TAKUKURU pekee na kueleza kuwa Jamii kwa ujumla inapaswa kushiriki katika mapambano ya Rushwa.

Sauti ya katibu tawala mkoa wa Geita Mohamed Gombati

Warsha hiyo imejumuisha mada mbalimbali zikiwemo aina za rushwa, athari zake kwa maendeleo ya kijamii na kiuchumi, pamoja na mbinu za kuripoti vitendo vya rushwa kwa usalama na ufanisi.

Kauli mbiu ya warsha ya mwaka huu ni “Kuzuia Rushwa ni Jukumu langu na lako– Tutimize Wajibu Wetu”

Katika kampeni ya mwaka huu mbali na warsha hii ya siku mbili, pia itafanyika mikutano 28 ngazi ya vijiji ili kuhakikisha ujumbe unawafikia watu wa makundi yote katika jamii.