Wapangaji walalamikia nyuma kukosa choo Mission

28 January 2025, 12:31 pm

Licha ya serikali kupitia wizara ya Afya kusisitiza juu ya umuhimu wa kila kaya kuwa na choo bora, bado utekelezaji wa agenda hii umekuwa wa kusua sua.

Na: Amon Mwakalobo – Geita

Wapangaji wanaoishi kwenye nyumba moja iliyopo maeneo ya Miti mirefu mtaa wa Misssion manispaa ya Geita wamemlalamikia mmiliki wa nyumba hiyo kwa kutowajengea choo bora na badala yake wanatumia shimo tu ambapo hapana hata ukuta wala kuezekwa.

Wakiongea na Storm FM Januari 27, 2025 wapangaji hao wamesema wanalipa kodi vizuri na kwa wakati isipokuwa wakimwambia kuhusu choo anakuwa anawaahidi tuu kurekebisha lakini ni zaidi ya miaka minne mpaka sasa hajajenga choo.

Mmiliki wa nyumba hiyo alipotafutwa na Storm FM alikataa kuzungumza huku akitishia kuwafukuza wapangaji waliotoa malalamiko hayo.

Bibi Afya Ngazi ya Mtaa wa Mission Bi. Magreth William amesema wamefika katika nyumba hiyo na tayari wamempa maelekezo ya kujenga haraka iwezekanavyo choo hicho na asipofanya kwa wakati atachukuliwa hatua za kisheria ikiwemo kupigwa faini.