![](https://radiotadio.co.tz/mazingirafm/wp-content/uploads/sites/14/2024/07/img-20240717-170945-506-1.jpg)
![](https://radiotadio.co.tz/mazingirafm/wp-content/uploads/sites/14/2021/03/whatsapp-image-2021-03-24-at-152149-150x150.jpg)
21 July 2024, 8:27 pm
Na Thomas Masalu
Robert Chilare, mzazi wa mwanafunzi wa kike wa kidato cha kwanza katika shule ya sekondari Mekomaliro, iliyoko kata ya Mihingo, wilaya ya Bunda, amemhamishia mtoto wake shule nyingine baada ya kuteswa mara kwa mara na mmoja wa walimu wa shule hiyo.
Mwalimu huyo alijaribu kumtongoza mwanafunzi huyo na alipoonywa, aliahidi kumpa adhabu kali mpaka atakapokubali ombi lake.
Chilare ameeleza malalamiko yake mbele ya Mbunge wa Jimbo la Bunda, Mheshimiwa Boniphace Mwita Getere, katika kikao cha kuangalia utekelezaji wa ilani ya Chama Cha mapinduzi CCM, katika kata ya Mihingo.
Chilare amesema alipopokea taarifa kutoka kwa mtoto wake kuhusu tukio hilo, alichukua hatua za haraka ikiwa ni pamoja na kufika shuleni na kuonana na Mkuu wa Shule.
Kikao cha dharura kilifanyika kilichohusisha Mkuu wa Shule, mzazi wa mtoto, Mratibu wa Elimu wa Kata, mwalimu anayetuhumiwa, walimu wengine wawili na mwanafunzi mwenyewe.
Mwanafunzi alieleza kuwa alikumbana na tukio hilo kama alivyoeleza mzazi, huku mwalimu akikiri wazi kuhusika katika suala hilo.
Kufuatia malalamiko hayo, Diwani wa kata ya Mihingo, Mheshimiwa Nyambura Nyamhanga, alisimama na kueleza kuwa amepokea taarifa za malalamiko ya mzazi huyo na hatua alizochukua.
Mbunge wa Jimbo la Bunda, Mheshimiwa Boniphace Mwita Getere, amemshauri Mkurugenzi wa Halmashauri ya Wilaya ya Bunda kuchunguza suala hilo kwa umakini bila kumuonea haya mtu.
Getere amesema serikali ya awamu ya sita inataka watoto wasome na siyo kukatishwa masomo kwa sababu ya mtu mmoja.
Hata hivyo ofisi ya idara ya elimu secondari halmashauri ya wilaya ya Bunda kupitia kwa kaimu ofisa elimu secondari January Nzumba amesema watalifanyia kazi suala hilo haraka ili kuondoa taharuki iliyopo.