Zenj FM
  Stream radio
Menu
Zenj FM
  2. Polisi
  3. Polisi Kusini Unguja wapeleka tabasamu kwa watoto yatima Maftuh Foundation

Polisi Kusini Unguja wapeleka tabasamu kwa watoto yatima Maftuh Foundation

1 August 2026, 22:40

Kamanda wa Polisi Mkoa wa Kusini Unguja, Kamishna Msaidizi Mwandamizi wa Polisi, SACP Daniel Emmanuel Shillah, akiwa na viongozi wa Jeshi la Polisi Mkoa wa Kusini, viongozi wa katuo cha kulelea watoto cha Maftuh Foundation pamoja na Watoto wanao lelewa kituoni hapo

Jeshi la Polisi Mkoa wa Kusini Unguja limetoa msaada wa mahitaji mbalimbali kwa Kituo cha Watoto Yatima cha Maftuh Foundation, Kibele, ikiwa ni sehemu ya maadhimisho ya Siku ya Polisi Jamii na kuonesha dhamira ya kushirikiana na jamii. Kamanda wa Polisi Mkoa huo, SACP Daniel Emmanuel Shillah, amesema msaada huo unadhihirisha upendo, mshikamano na uwajibikaji, huku akitoa wito kwa wadau kuendelea kusaidia watoto wenye mahitaji maalumu.

Na Mary Julius.

Jeshi la Polisi Mkoa wa Kusini Unguja limedhihirisha dhamira yake ya kuendelea kushirikiana na jamii baada ya kukabidhi msaada wa mahitaji mbalimbali kwa Kituo cha Watoto Yatima cha Maftuh Foundation kilichopo Kibele, Wilaya ya Kati, ikiwa ni sehemu ya maadhimisho ya Siku ya Polisi Jamii.

Akizungumza wakati wa hafla hiyo, Kamanda wa Polisi Mkoa wa Kusini Unguja, Kamishna Msaidizi Mwandamizi wa Polisi, SACP Daniel Emmanuel Shillah, amesema Jeshi la Polisi ni jeshi la wananchi na lina wajibu wa kuwafikia na kuwasaidia watu wote, hasa makundi yenye mahitaji maalumu.

Kamanda Shillah amesema msaada huo, ingawa ni mdogo ukilinganisha na mahitaji ya kituo hicho, umebeba ujumbe mkubwa wa upendo, mshikamano na uwajibikaji kwa jamii.

Kamanda Shillah ametoa wito kwa wananchi na wadau mbalimbali kujitokeza kusaidia watoto hao kwa kuwa ni sehemu ya jamii na taifa kwa ujumla.

Aidha, amewahimiza watoto wanaolelewa katika kituo hicho kuendelea kuwa na maadili mema, kumcha Mwenyezi Mungu, kuwaheshimu walezi wao na kujituma katika masomo ili wawe viongozi na raia wema wa baadaye. Vilevile, amewapongeza askari walioshiriki kwa hiari kufanikisha upatikanaji wa msaada huo.

Sauti ya Kamanda wa Polisi Mkoa wa Kusini Unguja, Kamishna Msaidizi Mwandamizi wa Polisi, SACP Daniel Emmanuel Shillah.
Kamanda wa Polisi Mkoa wa Kusini Unguja, Kamishna Msaidizi Mwandamizi wa Polisi, SACP Daniel Emmanuel Shillah, akimkabidhi mtoto zawadi.

Kwa upande wake, Mkuu wa Polisi Jamii Mkoa wa Kusini Unguja, ACP Mohammed Abdallah Juma, amesema maadhimisho ya Siku ya Polisi Jamii mwaka huu yanaambatana na shughuli mbalimbali za kijamii zinazolenga kuimarisha uhusiano kati ya Jeshi la Polisi na wananchi.

Sauti ya Mkuu wa Polisi Jamii Mkoa wa Kusini Unguja, ACP Mohammed Abdallah Juma.

Naye Mkurugenzi na Mwanzilishi wa Maftuh Foundation, Fatma Ali, amesema kituo hicho kilichoanzishwa mwaka 2017 kikiwa na watoto watano, sasa kinahudumia watoto 85.

Amesema kituo hakina mfadhili wa kudumu na kinategemea misaada kutoka kwa watu binafsi na taasisi mbalimbali.

Aidha Fatma amewaomba wadau kujitokeza kusaidia ujenzi wa bweni la watoto wa kiume pamoja na kutatua changamoto nyingine zinazokikabili kituo hicho, ikiwemo uhaba wa majengo na kukatika kwa umeme mara kwa mara, hali inayowaathiri watoto katika masomo na shughuli zao za kila siku.

Sauti ya Mkurugenzi na Mwanzilishi wa Maftuh Foundation, Fatma Ali.

Nao watoto wanaolelewa katika kituo hicho wamelishukuru Jeshi la Polisi kwa msaada waliowapatia na kutoa wito kwa jamii kuiga mfano huo kwa kuendelea kuwasaidia watoto wenye mahitaji maalumu.

Sauti ya Watoto.

Maadhimisho ya Siku ya Polisi Jamii mwaka huu yanatarajiwa kufikia kilele chake tarehe 25 Agosti mkoani Mbeya, yakihusisha shughuli mbalimbali za kuimarisha ushirikiano kati ya Jeshi la Polisi na wananchi.