![](https://radiotadio.co.tz/joyfm/wp-content/uploads/sites/39/2024/07/msaada-1.jpg)
![](https://radiotadio.co.tz/joyfm/wp-content/uploads/sites/39/2023/07/img-20230703-wa0002-150x150.jpg)
26 July 2024, 13:16
Wananchi wa kijiji cha Lyabusenda kata ya Sunuka wilayani Uvinza ambao ni miongoni mwa wanaopitia kipindi kigumu baada ya shughuli za uvuvi kusitishwa ziwa Tanganyika na kusababisha kipato kuyumba wameomba wadau wa maendeleo kuwasaidia kuwapa misaada ili kujikimu kimaisha.
Na Timotheo Leonard – Uvinza
Shirika la kidini linalojishughulisha kufundisha neno la Mungu na maendeleo la Hope of the Nations limetoa msaada wa vitu mbalimbali ikiwemo mchele kilo 1,000 na maharage kilo 500 kwa wananchi wa kijiji cha Lyabusende kata ya Sunuka wilayani Uvinza mkoani Kigoma.
Akizungumza wakati wa kukabidhi msaada huo, mkurugenzi wa shirika hilo la Hope of the Nations Bw. Horold Knepper amesema wameamua kutoa msaada huo baada ya kuona wakazi wa eneo hilo wana uhitaji wa mahitaji mbalimbali.
“Tupo hapa kwa ajili ya kuwasaidia watu ambao wanasumbuka kupata chakula wakati mwingine kutokana na sababu za kitega uchumi chao cha uvuvi kupumzishwa na leo tumetoa msaada wa kilo 1,000 za mchele na kilo 500 za maharage ili kuwezesha takribani familia miatatu.”
Kwa upande wake Afisa Mtendaji wa kijiji cha Lyabusende kata ya Sunuka Bw. Michael Venance amelishukuru shirika hilo kwa kuwapatia msaada wa mchele na maharage wananchi ambao anaamini utawasaidia kujikimu kimaisha.
Akizungumza kwa niaba ya wananchi wenzake Bi. Anna Raymond amelishukuru shirika hilo kwa kuona kuwa wanapitia wakati mgumu na wanahitaji msaada wa mahitaji mbalimbali ikiwemo chakula.