Watanzania wahimizwa kudumisha amani

20 July 2026, 4:49 pm

Watanzania  wametakiwa kuendelea kudumisha amani, umoja na mshikamano,kwakua  ndiyo msingi wa maendeleo ya taifa pamoja na kuunga mkono juhudi za Serikali katika sekta ya elimu.

Na Emmy Peter

Mbunge wa Babati mjini ambae ni  Naibu Spika wa Bunge la Jamhuri ya muungano wa Tanzania, Daniel Barani Sillo amewataka watanzania kuendelea kudumisha amani, umoja na mshikamano, akisisitiza kuwa mazingira ya amani ndiyo msingi wa maendeleo ya taifa pamoja na kuunga mkono juhudi za Serikali katika sekta ya elimu.

Silo ametoa kauli hiyo wakati akichangia harambee ya ujenzi  wa shule ya msingi ya kiislamu inayojengwa  katika Halmashauri ya wilaya ya Babati mkoani Manyara, amesema wadau wa maendeleo wanapaswa kuendelea kuunga mkono juhudi za Serikali, hususan katika sekta ya elimu, ili kuhakikisha watoto wanapata mazingira bora ya kujifunzia na elimu bora 

kwa upande wake, Sheikh wa mkoa wa Manyara  Mohamed Kadidi amesema waumini wanapaswa kuendelea kuilinda amani ya nchi na kushirikiana na Serikali katika utekelezaji wa miradi ya maendeleo ikiwemo ujenzi wa shule hiyo ambayo itachangia kutoa elimu bora pamoja na malezi yenye maadili mema kwa watoto.

Aidha baadhi ya wananchi waliohudhuria harambee hiyo wameishukuru Bakwata kwa kuanzisha wazo la ujenzi wa shule hiyo, wakisema litakuwa na manufaa makubwa kwa jamii na itasaidia kuandaa kizazi chenye elimu, maadili na uzalendo.