Boma Hai FM
  Stream radio
Menu
Boma Hai FM
  2. Elimu
  3. Envirocare yatoa elimu ya haki za binadamu na mirathi Siha

Envirocare yatoa elimu ya haki za binadamu na mirathi Siha

29 September 2026, 6:20 pm

Pichani ni washiriki wa mafunzo ya siku mbili yanayofanyika katika ukumbi wa Angaza women centre wakiwa na kaimu mkurugenzi wilaya ya Siha Marko Masue(wa pili kushoto) mkurugenzi wa miradi kutoka Envirocare Amos Mbwambo(Picha na Elizabeth Mafie)

Na Elizabeth Mafie

Jukumu la kulinda haki na kuhakikisha wananchi wanapata huduma stahiki na za kisheria si jukumu la taasisi moja pekee, bali ni la serikali, mahakama, jeshi la polisi, asasi za kiraia, viongozi wa dini na wazee wa kimila.

Kauli hiyo imetolewa Septemba 29, 2026 na kaimu mkurugenzi wa Halmashauri ya Wilaya ya Siha, Marko Masue, katika ukumbi wa Angaza Women Center uliopo wilayani Siha wakati wa mafunzo yaliyoandaliwa na shirika lisilo la kiserikali la mazingira na haki za binadamu(Envirocare) yaliyohudhuriwa na watu 51 kutoka katika makundi mbalimbali.

Sauti ya kaimu mkurugenzi wa Halmashauri ya Wilaya ya Siha, Marko Masue

Marko Masue amewasihi viongozi wa dini pamoja na wazee wa kimila kutumia nafasi zao katika jamii kuhamasisha haki, amani, hekima, sheria na kulinda utu wa kila mwananchi na kwamba  watendaji wa kata wanapaswa kuhakikisha wananchi wanapata taarifa sahihi na kuelekezwa kwenye mifumo sahihi ya kutatua migogoro yao.

Pichani ni kaimu mkurugenzi mtendaji wa halmashauri ya Siha Marko Masue akizungumza na washiriki wa mafunzo( ambao hawapo pichani) (Picha na Elizabeth Mafie)

Ameongeza kuwa jeshi la polisi, mahakama na taasisi nyingine za haki ni muhimu kuendelea kuhakikisha wananchi wanahudumiwa kwa haki, heshima na kuzingatia sheria huku akihimiza wanawake, vijana na watu wenye ulemavu kutumia fursa ya mafunzo hayo kujifunza, kuuliza maswali na kushiriki kikamilifu katika masuala yanayohusu haki zao.

Pichani ni Lolande Lema kutoka shirika la envorcare akieleze kuhusu mradi(picha za Elizabeth Mafie)

Naye mkurugenzi wa miradi wa shirika hilo, Amosi Mbwambo, amesema mradi huo ni wa miaka mitatu ambao umeanza rasmi mwaka 2026 hadi 2028, ukiwa na lengo la kutoa elimu kuhusu masuala ya  mazingira ,haki za binadamu , na eneo la jinsia hususani masuala ya mirathi, pamoja na kuboresha maisha ya wananchi wa Siha.

Sauti ya mkurugenzi wa miradi wa shirika la Envirocare Amosi Mbwambo,

Nao baadhi ya washiriki wa mafunzo hayo, akiwemo mtendaji wa Kata ya Livishi, Subela Saidi, na Honest Asei, mtendaji wa Kata ya Karansi, wamesema mafunzo hayo waliyopatiwa na shirika la Envirocare yatawasaidia katika kutatua migogoro mbalimbali, ikiwemo migogoro ya ardhi, pamoja na kuwaelimisha wananchi wao kuhusu haki za binadamu.

Sauti ya Honest Asei, mtendaji wa Kata ya Karansi,

Envirocare ni asasi isiyokuwa ya kiserikali iliyoanzishwa mwaka 1993, makao makuu yakiwa mkoani Dar es Salaam pamoja na ofisi ndogo zinazopatikana mkoani Kilimanjaro, wilaya ya Siha na Shirika hilo linafanya kazi katika maeneo makubwa matatu ambayo ni mazingira, haki za binadamu na jinsia

Sauti ya Subela Saidi mtendaji wa Kata ya Livishi