Kampeni ya polio Simanjiro: Watoto zaidi ya laki moja kufikiwa

26 August 2026, 4:03 pm

Na Joyce Elius

Zaidi ya watoto 116,125 wenye umri chini ya miaka 10 katika Wilaya ya Simanjiro, Mkoani Manyara, wanatarajiwa kufikiwa na kupatiwa chanjo ya matone ya Polio. Kampeni hiyo kabambe inalenga kukinga kundi hilo dhidi ya maambukizi ya virusi vya ugonjwa huo unaoweza kusababisha ulemavu wa kudumu au kifo.

Akizungumza wakati wa Mkutano wa Baraza la Madiwani wa Halmashauri ya Wilaya ya Simanjiro uliofanyika katika Mji Mdogo wa Orkesumet, Mganga Mkuu wa Wilaya (DMO), Dkt. Lengai Mollel, amewataka wazazi na walezi kutoa ushirikiano wa kutosha ili kufanikisha zoezi hilo la kitaifa.

Dkt. Lengai alibainisha kuwa kampeni hiyo ya siku nne itaanza rasmi kuanzia Agosti 27 hadi Agosti 30, 2026, ikilenga kufikisha huduma hiyo katika kila kijiji na kitongoji ndani ya wilaya hiyo.

Umuhimu wa Chanjo na Njia za Maambukizi

Akieleza kuhusu madhara ya ugonjwa huo, Dkt. Lengai alisisitiza kuwa Polio ni ugonjwa unaosababishwa na virusi na unaambukizwa kwa urahisi kwa kutozingatia kanuni za usafi-hasa kupitia chakula au maji yaliyochafuliwa na kinyesi cha mtu aliyeambukizwa.

Aliongeza kuwa chanjo ndiyo njia kuu na salama zaidi ya kumlinda mtoto na kuzuia msambao wa virusi hivyo katika jamii.

“Mtoto anaweza kupewa chanjo ya matone katika kampeni hii hata kama aliwahi kupata chanjo hapo awali, kwa kuwa chanjo hiyo inaongeza ulinzi dhidi ya Polio na kuimarisha kinga ya jamii. Ewe mzazi au mlezi, usikubali mtoto apate ulemavu kwa kukosa chanjo. Hakikisha Agosti 27 hadi 30, 2026 anapata chanjo; kinga ya mtoto ni jukumu letu sote,” alisisitiza Dkt. Lengai.

Mbinu za Ufikiaji na Maandalizi

Wilaya ya Simanjiro imejipanga kikamilifu kushirikisha wataalamu wa afya, viongozi wa serikali za mitaa, na wahudumu wa afya ngazi ya jamii (CBHPs). Ili kuhakikisha hakuna mtoto anayeachwa nyuma, timu za afya zitatumia mbinu mbalimbali za ufikiaji ikiwemo:

• Kupita nyumba kwa nyumba katika vijiji na vitongoji vyote.
• Kuweka vituo vya muda katika maeneo ya mikusanyiko kama vile masokoni, nyumba za ibada, na vituo vya usafiri.
• Kutoa elimu ya afya kuhusu usafi wa mazingira na nyanja za kujikinga na magonjwa ya milipuko.

Ushiriki wa Viongozi na Jamii

Kwa upande wake, Mwenyekiti wa Halmashauri ya Wilaya ya Simanjiro, Kaleya Melita Mollel, alieleza kuwa madiwani wote wataingia nyanjani kuhamasisha wananchi katika kata zao ili kufanikisha malengo ya kampeni hiyo.

Kaleya aliongeza kuwa elimu ya kutosha itatolewa kwa wazazi ili kuondoa hofu au dhana potofu kuhusu chanjo na kuhakikisha kila mtoto anayestahili anapata tone hilo la afya.