Aweso akabidhi mashine ya kuchapisha Mkwaja sekondari

26 October 2024, 8:46 pm

Kwa darasa hilo ni wanafunzi 20 pekee wamefanikiwa kufikia hatua ya kuhitimu kidato cha nne kati wanafunzi 62 walioanza nao masomo ya kidato cha kwanza mwaka 2021.

Na Cosmas Clement

Mbunge wa jimbo la Pangani na waziri wa Maji Mhe. Jumaa Hamidu Aweso, leo ametoa msaada wa mashine ya kuchapishia (photocopy machine) kwa shule ya sekondari Mkwaja iliyopo kata ya Mkwaja wilayani Pangani Mkoani Tanga.

Mashine hiyo imekabidhiwa Jumamosi katika sherehe za mahafali ya tisa ya shule ya sekondari hiyo, kwa niaba yake na Katibu wa Mbunge Mwl. Salmini Mmari ili kurahisisha uchapishaji wa mitihani na kuinua kiwango cha taaluma katika shule hiyo.

Kwa upande wake mwenyekiti wa Bodi ya Shule ya Sekondari Mkwaja Bwana Omari Kimbwanga amemshukuru mbunge kwa kutoa msaada wa mashine hiyo kwamba itakuwa ni msaada mkubwa kitaaluma kwa shule hiyo.

Aidha Katika risala iliyosomwa na wanafunzi imeeleza kuwa pamoja na ukuaji wa kitaaluma, wa shule hiyo inakabiliwa na changamoto mbalimbali ikiwemo uchakavu wa miundombinu ya vyoo.

Mahafali hayo yamejumuisha wanafunzi wahitimu  20 ambao wavulana sita na wasichana 14.