Sibuka FM
  Stream radio
Menu
Sibuka FM
  2. Kijamii
  3. Fisi wavamia na kuua kondoo wa mahari Bariadi

Fisi wavamia na kuua kondoo wa mahari Bariadi

2 April 2025, 8:04 pm

Mashuhuda wakishuhudia namna ambavyo fisi wameua kondoo 21 na kuacha umasikini kwenye familia husika. Picha na Anitha Balingilaki

“Hivi hatuwezi kumaliza kabisa suala la fisi mkoani hapa? Siku chache zilizopita matukio kama haya yaliripotiwa katika wilaya za Itilima na Maswa leo hii wameingia mjini Bariadi je, ni kweli hatuwezi au ndiyo kusema bado hatujaamua kufanya hivyo? Naomba kwenye hili sungusungu wapewe nafasi kumaliza shida hii ni fikra zangu tu lakini”.

Na, Daniel Manyanga 

Kondoo wapatao 21 wameuawa na kundi la fisi lililovamia kwenye zizi nyumbani kwa Mageni Maduhu wilayani Bariadi mkoani Simiyu majira ya saa nne usiku wa April mosi mwaka huu.

Picha ya kondoo waliouliwa na fisi baada ya fisi kuvamia zizi. Picha na Anitha Balingilaki

Akizungumza na Sibuka FM mapema leo ilipofika kwa ajili ya kushuhudia tukio ,Mageni Maduhu amesema mnamo majira ya saa tano usiku alisikia sauti za fisi wakilia ndipo alitoka nje kuangalia nini kinaendelea alikuta kondoo 21 wameuliwa kati ya hao wapo kondoo wa kuposea binti kwa ajili ya kijana wake kupata mke.

Sauti ya mumiliki wa kondoo hao Mageni Maduhu akielezea namna ambavyo tukio lilivyotokea

Mangu Mangolyo ni mwenyekiti wa Mtaa huo amesema kuwa  tukio hilo ni la kushangaza kwani halijawahi kusikika au kuona fisi wanashambulia au kula kondoo wengi kiasi hicho mara zote fisi huchukua kondoo mmoja na kwenda naye tofauti na kilichotokea.

Sauti ya mwenyekiti wa mtaa huo akisikitishwa na tukio hilo

Baadhi ya mashuhuda wa tukio hilo wamekiri kuwepo kwa wanyama hao mjini Bariadi huku wakitilia shaka usalama wa mifugo yao na kuomba serikali ione namna ya kumaliza shida hiyo ya fisi.

Sauti ya shuhuda wa tukio hilo akiomba serikali kujua hatua za haraka za kuwazuia fisi ambao sasa wanatishia usalama wa mifugo

Kwa upande wake Mkuu wa Wilaya ya Bariadi Simon Simalenga amefika katika familia hiyo iliyokumbwa na tukio na kutoa pole huku akitangaza msako mkali wa wanyama hao kutokana na kupokea taarifa za uwepo wa wanyama hao mjini humo.

Sauti ya DC wa Bariadi Simon Simalenga akitangaza oparesheni ya kutokomeza fisi mjini hapo