Upepo wa ajabu wavuma na kuangusha kanisa Sengerema

13 November 2024, 8:17 pm

Katika hali isiyo ya kawaida waumini wa kanisa la TEF kwa Neema lililopo katika kitongoji cha Mkomba kijiji cha Busisi, wamejikuta wakiabudia nje baada ya upepo kuvuma ghafla na kudondosha jengo la kanisa lao usiku.

Na;Emmanuel Twimanye

Katika hali isiyokuwa ya kawaida  upepo mkali umevuma ghafla na kuangusha kanisa la TFE kwa Neema Mkomba katika kijiji Cha Busisi kata ya Busisi wilayani Sengerema mkoani Mwanza na kusababisha waumini wa kanisa hilo kufanyia ibaada  chini ya mti. .

Wakizungumzia tukio hilo  baadhi ya waumini wa kanisa hilo wameshangazwa na kusikitishwa na tukio hilo huku wakiwaomba  msaada  kwa watu wenye mapenzi mema  ili kurejesha kanisa hilo katika hali yake ya kawaida. 

Nao baadhi ya viongozi  na waumini wa kanisa la AICT  Mlimani  Mkomba  wamelazimika kukatisha ibada na kufika katika kanisa hilo kwa ajili ya kuwafariji huku wakiahidi kuwasaidia ili  jengo la kanisa hilo. 

Mchungaji wa kanisa la TFE  kwa Neema mkomba   Timotheo Nziku  amesema kuwa tukio hilo limetokea majira ya saa moja  usiku na kusababisha uharibifu wa kanisa hilo na kuwaomba wadau mbalimbali kusaidia vifaa vya ujenzi.

Afisa mtendaji wa Kijiji Cha Busisi Peter Luboya  amethibitisha kutokea kwa tukio hilo na kutoa pole kwa waumini wa  kanisa hilo.

Kufuatia tukio hilo   Mwenyekiti wa Chama cha Mapinduzi   (CCM ) Wilaya ya Sengerema Mark Agustine Makoye   ameahidi kufikia eneo la tukio ili kuona namna  ya kutatua changamoto hiyo .