Moses akutwa na baiskeli aliyoiba kanisani Sengerema

6 October 2024, 5:21 pm

Jamii imekua haiwaamini vijana kutokana na kuwa na tamaa ya mali za haraka jambo lililopelekea kuwa wadokozi na wezi wa vitu mbalimbali kwenye maeneo yao.

Na;Emmanuel Twimanye

Kijana  mmoja mwenye umri wa miaka 17 amekamatwa na  Jeshi la Polisi jamii kata ya Misheni Wilayani Sengerema Mkoani Mwanza wakati  akimuuzia Baiskeli mkazi wa kata hiyo aliyoiba katika kanisa la Parokia ya Yesu Kristo Mfalme Sengerema.

Akizungumzia tukio hilo akiwa chini ya ulinzi wa Polisi jamii kijana huyo aliyefahamika kwa jina la Moses Emmanuel Nyanda  amekiri kuiba Baiskeli hiyo kanisani hapo na kwenda misheni kuiuza ndipo alipokamatwa na Jeshi la Polisi jamii.

Mmiliki wa Baiskeli hiyo Faustine  Chilimila amesema kuwa baada ya kumaliza misa ya kwanza    hakuikuta   baiskeli yake  alipokuwa ameiegesha na muda mfupi alipigiwa simu akitaarifiwa kuwa kijana mmoja amekamatwa misheni akiwa na Baiskeli hiyo. 

Mkazi wa misheni aliyetaka kuuziwa Baiskeli hiyo Masumbuko Costantine  amesema kuwa  wakati anauziwa  Baiskeli na  kijana huyo  alimuomba kibali na kukosa ndipo alipomshtukia   na kutoa taraifa kwa jeshi la polisi jamii na kufanikiwa kukamatwa.

Baadhi ya wananachi wa kata hiyo wamesikitishwa na tukio hilo na kuwaomba vijana kuacha kujihusisha na vitendo vya wizi.

Katibu wa Parokia ya Yesu  Kristo Mfalme Sengerema  Nichorous Chumus amekiri Baiskeli hiyo kuibiwa katika kanisa hilo na  kuwaomba wazazi kuwalea vijana katika maadili mema.

Naye Kamanda wa Polisii  jamii kata ya Misheni  Rajabu Tunge  amethibitisha kijana huyo kukamatwa na Jeshi hilo wakati akiuza Baiskeli hiyo na kuwaonya vijana kuacha kujihusisha na wizi.