Pambazuko FM Radio
  Stream radio
Menu
Pambazuko FM Radio
  2. Maendeleo
  3. Maafisa maendeleo watajwa chachu kufikia Uchumi jumuishi

Maafisa maendeleo watajwa chachu kufikia Uchumi jumuishi

2 March 2026, 1:52 pm

Picha ya maafisa maendeleo ya jamii baada ya Kikao(Picha na Katalina Liombechi)

Kuna umuhimu wa kuongeza kasi ya usajili wa vikundi mbalimbali ili kuwezesha wananchi kushiriki kikamilifu katika uchumi shindani na jumuishi

Na Katalina Liombechi

Katika kuhakikisha Dira ya taifa 2050 inatekelezwa kwa ufanisi, Mkoa wa Morogoro kupitia Idara ya Maendeleo ya Jamii umefanya kongamano lililowakutanisha Maafisa Maendeleo ya Jamii kutoka halmashauri zote tisa za mkoa huo, ambao wametajwa kuwa chachu muhimu ya kufikia dira hiyo.

Kongamano hilo lililobeba kaulimbiu isemayo, “Maafisa Maendeleo ya Jamii ni Chachu ya Kufikia Dira ya 2050,” lililenga kuchochea utekelezaji wa malengo ya kujenga uchumi imara, jumuishi na shindani; kukuza uwezo wa watu na maendeleo ya jamii; pamoja na kuhimiza uhifadhi wa mazingira na kuimarisha ustahimilivu dhidi ya mabadiliko ya tabianchi.

Akizungumza katika kongamano hilo, Afisa Maendeleo ya Jamii wa Mkoa wa Morogoro, Gibson Mwakoba, alisema lengo kuu la Dira ya 2050 ni kuhakikisha uchumi unakuwa jumuishi, kutokomeza umasikini, kuongeza kasi ya uwezeshaji wa vijana, kusisitiza usawa wa kijinsia, pamoja na kukuza ujumuishi wa kifedha kwa makundi yote ya jamii.

Picha ya Gibson Mwakoba Afisa maendeleo Mkoa wa Morogoro(Picha na Katalina Liombechi)
Sauti ya Gibson Mwakoba

Katika kongamano hilo, Mamlaka ya Udhibiti wa Ununuzi wa Umma (PPRA) kupitia Afisa Manunuzi wa PPRA Mkoa wa Morogoro, Christopher Masebo, ambaye akiwa mmoja wa wawezeshaji, alitoa elimu kuhusu ushiriki wa makundi maalum katika ununuzi wa umma.

Masebo amewakumbusha Maafisa Maendeleo ya Jamii kuhakikisha makundi maalum, ikiwemo wanawake, vijana na watu wenye ulemavu, yanajumuishwa kikamilifu katika fursa za ununuzi wa umma na kupewa kipaumbele stahiki kwa mujibu wa sheria na kanuni zilizopo.

Picha ya Christopher Mwasebo(Picha na Katalina Liombechi)
Sauti ya Masebo Afisa manunuzi PPRA

Kwa upande wake, Kaimu Afisa Maendeleo ya Jamii Halmashauri ya Mji wa Ifakara, Mercy Gibson Minja, amesema kuwa ili kufanikisha Dira ya 2050 ni lazima kila Afisa Maendeleo ya Jamii akatekeleza majukumu yake kwa weledi, uwajibikaji na ubunifu ili kuleta matokeo chanya kwa jamii.

Picha ya Mercy Minja Kaimu Afisa maendeleo Ifakara(Picha na Katalina Liombechi)
Sauti ya Mercy Minja

Kongamano hilo ambalo limefanyika hivi karibuni, katika mji wa Ifakara kwenye ukumbi wa Mlimba limekuwa jukwaa muhimu la kubadilishana uzoefu na mikakati ya pamoja ya kuharakisha maendeleo ya wananchi na taifa kwa ujumla.