Wanahabari Iringa wajengewa umahiri habari za kijinsia, mabadiliko tabia nchi

22 March 2026, 18:37

Wanahabari mkoani Iringa wakiwa katika picha ya pamoja baada ya kuhitimisha mafunzo ya habari za kijinsia na mabadiliko ya tabianchi yaliyofanyika katika ukumbi wa Siasa ni Kilimo uliopo mkoani humo. Picha na Zakaria Nyamoga.

Makundi yaliyo hatarini zaidi nchini yameendelea kukumbwa na changamoto kubwa katika upatikanaji wa huduma muhimu kufuatia athari za mabadiliko ya tabia ya nchi zinazozidi kushika kasi katika maeneo mbalimbali.

Na Marko Msafiri

Mtandao wa Jinsia Tanzania (TGNP) kupitia mradi wa “Ustahimilivu Wake, Dunia Yetu” (HROP) umetoa mafunzo maalumu kwa waandishi wa habari wa mkoa wa Iringa, yakilenga kuimarisha uelewa kuhusu masuala ya kijinsia na mabadiliko ya tabia ya nchi.

Mafunzo hayo yamefanyika katika ukumbi wa Siasa ni Kilimo uliopo mkoani humo, ikiwa ni sehemu ya juhudi za kuhakikisha wanahabari wanaripoti kwa kina na kwa uwiano sawa kuhusu athari za mabadiliko ya tabia ya nchi.

Akizungumza baada ya mafunzo kutamatika Mwezeshaji, Deogratius Temba amesema kupitia waandishi wa habari kutasaidia kuharakisha kutimia kwa malengo madhubuti ya uanzishwaji wa mradi huo kwa jamii.

Sauti mwezeshaji wa mafunzo

Aidha Ndg. Temba ameongeza kuwa, athari hizo za mabadiliko ya tabia nchi zimekuwa mwiba mkali kwa makundi hasa ya watoto, wanawake, vijana na wenye ulemavu, jambo linalohitaji nguvu ya wanahabari ili kusaidia kupunguza au kukomesha athari hasi zinagusa makundi hayo.

Pichani ni mwezeshaji wa mradi huo wa “Ustahimilivu Wake, Dunia Yetu” Deogradius Temba akiwa katika zoezi la utoaji wa mafunzo kwa washiriki ambao ni waandishi wa habari wa mkoa wa Iringa. Picha na Zakaria Nyamoga.

Nao washiriki wa mafunzo hayo wameahidi kuyatumia maarifa waliyoyapata kuboresha utendaji wao wa kazi hususani katika kuibua na kushughulikia changamoto zinazoikumba jamii na kwamba sauti na kalamu zao zitakuwa chachu ya mabadiliko chanya kwa makundi hayo yaliyo hatarini zaidi.

Sauti washiriki wa mafunzo

Miongoni mwa washiriki wa mafunzo hayo ya habari za kijinsia na mabadiliko ya tabianchi yanayoratibiwa na TGNP kupitia mradi wa HROP. Picha na Zakaria Nyamoga.

Mradi huo wa “Ustahimilivu wake, Dunia yetu” (HROP) unatekelezwa katika mikoa ya Iringa, Njombe na Mbeya.